ភ្នំពេញ៖ ក្រោយជំនួបជាមួយលោក សាយ សំអាល់ រដ្ឋមន្រ្តីក្រសួងបរិស្ថាន ព្រមទាំងលោក ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ លោក Dominic Raab រដ្ឋមន្ត្រីការបរទេស និងអភិវឌ្ឍន៍នៃចក្រភពអង់គ្លេស បានអញ្ជើញទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដែលជាផ្នែកមួយនៃដំណើរទស្សនកិច្ចរបស់លោកនៅលើទឹកដីព្រះរាជាណាចក្រកម្ពុជាផងដែរ។ 

នាថ្ងៃពុធ ទី២៣ ខែមិថុនា ឆ្នាំ២០២១ ឯកឧត្ដម Dominic Raab MP រដ្ឋមន្ត្រីការបរទេស និងអភិវឌ្ឍន៍នៃចក្រភពអង់គ្លេស អមដំណើរដោយលោកជំទាវ Tina S Redshaw ឯកអគ្គរាជទូតអង់គ្លេសប្រចាំកម្ពុជា អញ្ជើញទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដោយមានការទទួលស្វាគមន៍ពីសំណាក់លោក ឆាយ វិសុទ្ធ ប្រធាននាយកដ្ឋានសារមន្ទីរនិងជាតំណាងក្រសួងវប្បធម៌និងវិចិត្រសិល្បៈ និងលោក ហង្ស និស្ស័យ ប្រធានសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។ ដំណើរទស្សនកិច្ចនេះបានបញ្ចប់ដោយរលូន ដោយឯកឧត្ដម Dominic Raab MP បានសម្ដែងការគោរព និងសោកស្ដាយចំពោះរឿងរ៉ាវ ដែលបានកើតឡើងមកលើប្រជាជនកម្ពុជាក្នុងរបបប្រល័យពូជសាសន៍ដ៏សាហាវយង់ឃ្នងនេះផងដែរ។ 

គួរបញ្ជាក់ថា រដ្ឋមន្រ្តីការបរទេស​ និងអភិវឌ្ឍន៍របស់អង់គ្លេស​ លោកដូមីនិក រ៉ាអាប់​ (Dominic Raab) ​បានជួបជជែកគ្នា​ជាមួយរដ្ឋមន្រ្តីការបរទេស​កម្ពុជា ​លោកប្រាក់ សុខុន ​នៅថ្ងៃពុធម្សិលមិញនេះ​ផងដែរ ដោយនៅក្នុងជំនួបនេះ​ រដ្ឋមន្រ្តីការបរទេសទាំង២​បានជជែកពិភាក្សាគ្នា​ពីបញ្ហាសិទ្ធិមនុស្ស​នៅកម្ពុជា​និងបញ្ហានៅក្នុង​ប្រទេសភូមា​។ ដោយឡែកចំពោះជំនួបជាមួយរដ្ឋមន្រ្តីក្រសួងបរិស្ថាន ភាគីទាំងពីរបានពិភាក្សាគ្នាពីមហិច្ឆតាអាកាសធាតុរបស់កម្ពុជា មុនការឈានមកដល់នៃកិច្ចប្រជុំកំពូលនៃការប្រែប្រួលអាកាសធាតុរបស់អង្គការសហប្រជាតិ (COP26) និងអាទិភាពរួមដូចជាធ្វើការឆ្ពោះទៅកាន់ការកំណត់ការបំភាយឧស្ម័នត្រឹមសូន្យ (NetZero) ការដាំដើមឈើឡើងវិញ ក៏ដូចជាជីវៈចម្រុះ និងពាណិជ្ជកម្មសត្វព្រៃខុសច្បាប់ ដែលនេះគឺជាលើកដំបូងបង្អស់សម្រាប់ដំណើរទស្សនកិច្ចរបស់លោកមកកាន់ប្រទេសកម្ពុជា៕